انا مش عايزة اتجوز

انا مش عاوزه اتجوووووووووووز







طبعا هتستغربوا جدا من عنوان الموضوع


فيه بنت تقول كده على نفسها .. فيه بنت مش عاوزه تتجوز .. اه انتى بتدارى خبتك يعنى عشان مفيش عرسان اتقدمولك ولا عاوزه تقوليلنا انهم كتير بس النفس بقى.


طبعا كلام الناس مبيخلصش.. سواء كان فيه عرسان ولا لا .. اتخطبت ولا اتجوزت ولا لسه


هو احنا عندنا الناس بتسكت .


المهم قبل ما ننسى موضوعنا الرئيسى .. هو فعلا عنوان الموضوع غريب ازاى مش عاوزه اتجوز . انا فعلا مش عاوزه اتجوز بس نفهم مغزى الجمله ايه






-انا مش عاوزه اتجوز عشان كلام الناس يخلص وبس ماهو زى ماقولنا كده كده كلامهم مبيخلصش ابدا ودايما مركزين مع الى رايح والى جاى .






-انا مش عاوزه اتجوز اى حد وخلاص عشان انا مش مقتنعه بمقوله (( ضل راجل ولا ضل حيطه )) البنت تعرف تعيش دلوقتى لوحدها وتعرف تصرف على نفسها كويس وزوجات كتير اليومين دول هما الى بيصرفوا على بيتهم وشايلينه فبكده المعنى ده اتغير من زمان .






-انا مش عاوزه اتجوز عشان اغير لقبى من (( انسه )) لـ (( مدام )) فيه بنات دلوقتى بتفكر تتجوز ومش مشكله تتطلق بعدها بكام شهر بس المهم يبقى اسمها اتجوزت .. لا الفكره دى لازم تتغير






-انا مش عاوزه اتجوز غير لما تبقى كرامتى مرفوعه مش احس ان العريس جاى عامل فيا جميله وانا جيت ولحقتك قبل القطر مايفوتك انا عاوزه اتجوز راجل يحتوينى واحس جنبه بالامان.






-انا مش عاوزه اتجوز راجل بس معاه فلوس وخلاص عشان اغير مستوايا الاجتماعى والمادى . انا عاوزه راجل بمعنى كلمه رجوله الى بقت قليله اليومين دول وجنبها الفلوس لانها مهمه برده فى زماننا ده لكن متكونش الاولويه


.


الى طلعت بيه بعد تفكير ان الجواز المهم فيه الاتفاق فى كل شئ والتوافق العقلى والفكرى والاجتماعى والمادى برده


والى طلعت بيه برده انى انسى كلام الناس لانه لا بيودى ولا بيجيب وبنات كتير بتتظلم وبتندم بعد كده عشان خايفه من الكلام الكتير وتخلص منه والناس برده مش بتسكت






المهم يعنى بعد ده كله الى عنده عريس بالمواصفات دى يبقى يكلمنى :))))))))


استودعكم الله






سارة كامل